Një aksident tragjik i ka marrë jetën, Mihallaq Milkanit, pedagogut të shquar të flotës Luftarako-Detare të Shqipërisë si dhe vëllait të regjisorit të madh Piro Milkanit.
Burime për mediat bëjnë me dije se 88-vjeçari humbi jetën tragjikisht pasi u godit më 29 mars nga një kamion në Worcester të Massachusetts, teksa po qëndronte me një mik të tijin në një parking të zonës.
Milkani ishte frekuentues i rregullt i një kafeneje në bulevardin “Richmond”, ku mblidhej gjithmonë me shokët e tij shqiptarë, por jo vetëm. Fatkeqësisht atë ditë kafeneja ishte e mbyllur dhe ata vendosën të shkonin diku tjetër. Gjatë rrugës, një kamion e përplasi teksa po kryente manovër në indietro në një shesh parkimi.
Për të gjithë që patën fatin ta njohin, Mihallaq Milkani, ishte një njeri shembullor, i dashur me të gjithë dhe një gjysh i palodhur i cili kujdesej çdo ditë për nipërit dhe mbesat e tij.
I lindur më 23 shtator 1935, në Drenovë, rrugëtimi i Mihallaqit ishte një udhëtim i karakterizuar nga guximi, përkushtimi dhe dashuria e palëkundur.
Pas studimeve në Akademinë Detare në Riga të Letonisë, Mihallaq filloi karrierën e tij si Oficer Detar, duke shërbyer me nder si lundërtar në nëndetëse. Pas shërbimit të tij detar, Mihallaq u bë profesor në Akademinë Detare në Vlorë. Pasioni i tij për të mësuar dhe përkushtimi i tij për të mësuar të rinjtë, la një gjurmë të thellë te ata.
Në shtator të vitit 1990, Mihallaq doli në pension dhe në qershor 1997 u transferua në Shtetet e Bashkuara me synimin për të siguruar një të ardhme më të ndritur dhe përmirësimin e mundësive arsimore për familjen e tij. Edhe në moshën 62-vjeçare ai kapërceu pengesat dhe vendosi jetën në një vend të ri. Një kopshtar i zjarrtë, një lexues i pangopur dhe një student i mprehtë i historisë, ai i mahniti të gjithë duke pasqyruar përvojat e tij të pasura të jetës. Mbi të gjitha, Mihallaq e çmonte kohën e kaluar me nipërit e tij të dashur, duke i falur në çdo moment dashuri dhe përkushtim.
Varrimi i tij do të bëhet të premten, më 5 prill, duke filluar në orën 11:00 në Kishën Ortodokse Shqiptare të Shën Mërisë, 535 Salisbury Street, ku do të nderohet dhe kremtohet me dashuri dhe nderim shpirti i Mihallaqit. Varrimi do të pasojë në varrezat Hope, 119 Webster Street.
